Presentación

A casa da xuventude de Cangas está ao teu dispor para dar resposta a todas esas demandas de xóvenes, que coma ti, pedides un lugar dende onde se traballe por e para a xuventude. Representa un punto de encontro, formación e asesoramento para a mocidade e un lugar exclusivo para que se desenvolvan os proxectos e ideas da xuventude, ademais de permitir un achegamento directo ás novas tecnoloxías.

Que é?

A Casa da Xuventude é un servizo do Concello de Cangas a través da súa Concellería de Xuventude e Voluntariado, dirixida a xóvenes de entre 5 e 35 anos.

O seu obxectivo principal é o de ofrecer á mocidade recursos e programas, atendendo principalmente as vosas necesidades formativas, informáticas e de lecer.

Todo isto, sempre coa participación de toda a mocidade da vila, sendo sen dúbida, esta a nosa fin, pois unicamente xuntos poderemos chegar a converter a Casa da Xuventude nun lugar de encontro, participación e promoción da xuventude.

Onde está?

A Casa da Xuventude atópase na Rúa Real, no edificio do antigo Concello, xusto en fronte da igrexa.

Pódeste por en contacto con nos de moito xeitos:

1. Por teléfono: chamando ao número 986 392 171
2. Por fax: enviádoo ao número 986 392 171
3. Por SMS: enviando a palabra “xuventude” ao número
4. Por correo eléctrónico: envíando un mail a xuventude@cangas.org.
5. Por correo postal: envíando unha carta ao enderezo “Casa da xuventude”, rúa Real 29, 36940, Cangas, Pontevedra.
   
   
   Ver mapa más grande

O noso horario de verán é de luns a venres de 09:00 a 14:00 h., aínda que no inverno tamén podes vir de 17:00 a 20:00 h. e os sábados de 11:00 a 13:00 h.

Que podes atopar?

Oficina de información xuvenil (OMIX)
Poderás recibir información sobre:

1. Becas, estudos, carnés desconto, traballos no estranxeiro.
2. Axudas, subvencións, premios, certames.
3. Cursos, xornadas, seminarios, conferencias.
4. Convocatorias vixentes e por suposto tódalas actividades que dende a Concellería se organicen ao longo do ano.

Tamén contarás cun servizo de asesoramento personalizado en materias de interese como o emprego, estudos, vivenda ou asociacionismo xuvenil.

Asimesmo terás acceso a servizos adicionais como:

1. Tramitación do Carné Xove > 30
2. Tramitación do Carné de Alberguista, en tódalas súas modalidades.
3. Tramitación de outros carnés como Teacher e ISIC.
4. Información e tramitación de programas que ofrece a Dirección Xeral de Xuventude.
5. A consulta da prensa diaria e outras publicacións relacionadas con temas de interese xuvenil.

Área de dinamización
É a encargada da programación das diversas actividades, exposicións, certames, charlas, obradoiros ou concertos que ao longo do ano se van desenvolvendo, melloradas e actualizadas aos vosos gustos e necesidades ano tras ano. Os campamentos de verán, o Salón do Cómic ou o Son de Cangas, son só algúns exemplos das actividades nas que ti podes participar.

Área de medios
Trátese dun servizo de balde adicado ao uso e coñecemento das novas tecnoloxías que pon á túa disposición o acceso a Internet e outros servizos ofimáticos:

1. Consulta de prensa: poderás consultar os principais xornais de tirada local e nacional (El Pais, Xornal de Galicia, La Voz de Galicia, Atlántico Diario, Diario de Pontevedra, Faro de Vigo e A Comarca entre outras publicacións)
2. Acceso a Internet durante unha hora diaria.
3. Correo electrónico: dende calquera ordenador da sala poderás enviar ou recibir correo web.
4. Servizos ofimáticos: tódolos ordenadores contan con programas de tratamento de texto, follas de cálculo, bases de datos, etc.
5. Gravación e impresión de arquivos e documentos.
6. Guía de recursos: para acceder máis sinxelamente á información que precisas.
7. Organización de actividades de formación encamiñadas á mocidade, coa fin de que se coñezan as utilidades da Internet e o uso da información electrónica.
8. Para poder ter acceso a estas prestacións só tes que solicitar o CiberXove

Oficina municipal de voluntariado
Este servizo nace coa vocación de ofertar ao voluntariado a posibilidade de satisfacer as súas inquedanzas e participar activamente no seu entorno sociocultural. Así mesmo, ábrese unha vía de colaboración coas asociacións locais que realizan actividades de ben común, e que poden completar e mellorar a súa oferta de actuación social grazas á solidariedade destas persoas.

Fundación Cangas Deporte
O seu obxectivo principal e o de promover e fomentar a práctica do deporte, para o cal contan cunha ampla organización de actividades deportivas ao longo do ano. Toda información que precises sobre o deporte local poderás atopala aquí.

Sala de usos múltiples
Un espazo creado especialmente para as túas reunións, conferencias, charlas, proxeccións e acondicionada para que fagas as túas exposicións.

Ludoteca.
Trátase dunha sala onde os cativo entre 5 e 12 anos poden disfrutar e aprender, realizando diferentes actividades como son:

1. Animación á lectura
2. Xogos de mesa
3. Xogos de animación
4. Contacontos
5. Obradoiros
6. Exposicións
7. Mediateca
8. Proxeccións
9. Xogos Tradicionais
10. Creatividade
11. Expresión Corporal
12. Reciclaxe
13. Biblioteca infantil

Sala de obradoiros
Alberga cursos e obradoiros propios (organizados dende a Concellería de Xuventude e Voluntariado) e externos, xa que se cede, en ocasións, a outros organismos cando o solicitan.

Agora xa coñeces a Casa da Xuventude e os servizos que ofrece, tan só nos queda animarte a que nos coñezas.

ACHÉGATE!